قوی چیلله گئجه سی دونیا قورتارسین
منه چوخدان قاباق دونیا قورتاریب
شهره كافور سپن زاماندان بری
اعتیراض سؤزجوكو اؤلندن بری
نه یامان قورتاردی بو دونیا منه
اؤلومده یاشاییر بو دونیا هله
سئوگی لر چؤننده شهوته ساری
قهبه لیك اولاندا بوگون بازاری
تانری گؤزللیگین عمل پوزاندان
بورونلار سربالا، كیچیك اولاندان
نه یامان قورتاردی بو دونیا منه
اؤلومده یاشاییر بو دونیا هله
ماتیك دوداق یئری بئیین بزییر
سایه ده گؤزلره پرده لر چكیر
خوخانلیغی قیزلار ایفتیخار سانیر
اوندان دیر كی دونیا بوردا قورتاریر
اوغلانلار آتالار جیب یئمیشیدیر
او قیزدان قورتاریب بونا راست گلیر
كؤرلوك گؤزلوكلری گؤزلرین توتوب
قیزلیق مئیدانیندا، اوغلانلار اوتوب
ائله سانیرام كی دونیا قورتولوب
پارچالانمیش اورك وطن دئمكدیر
نفتیمیزین پولو دادلی یئمكدیر
مال یئمزین مالین، بیر قاللاش یئیر
اؤز حاققین اونودان بو حالی سئور
قیصاص قیامته قالماز ایناندیم
هله نه یاخشی دیر، بوردا اویاندیم
دونیا قورتارسادا، قورتارماسادا
من اؤز ایشلریمی اوندان قورتاردیم
مریم علی زاده
۹۱/۹/۲۸
Qoy çillə gecəsi dünya qurtarsın
mənə çoxdan qabaq dünya qurtarıb
şəhrə kafur səpən zamandan bəri
etiraz sözcükü oləndən bəri
nə yaman qurtardı bu dünya mənə
ölümdə yaşayır bu dünya hələ
sevgilər çönəndə şəhvətə sarı
qəhbəlik olanda bugün bazarı
tanrı gözəlliyin əməl pozandan
burunlar sərbala, kiçik olandan
nə yaman qurtardı bu dünya mənə
ölümdə yaşayır bu dünya hələ
matik dodaq yeri beyin bəzəyir
sayə də gözlərə pərdələr çəkir
xuxanlığı qızlar iftixar sanır
ondan dır ki dünya burda qurtarır
oğlanlar atalar cib yemişidir
o qızdan qurtarıb buna rast gəlir
körlük gözlükləri gözlərin tutub
qızlıq meydaninda oğlanlar utub
elə sanıram ki dünya qurtulub
parçalanmış ürək vətən deməkdir
nəftimizin pulu dadlı yeməkdir
mal yeməzin malın bir qallaş yeyər
öz haqqın unudan bu halı sevər
qisas qiyamətə qalmaz inandım
hələ nə yaxşıdır, burda oyandım
dünya qurtarsada, qurtarmasada
mən öz işimi ondan qurtardım
Məryəm Əlizadə
91.9.28
دی دی دی دی دین دی دی دی دی دین
ساعات ۱۰
"گینه بیر گون قاباخ گونلره تای"
كیشی یوخودان دورور. هله گئجه نین باش آغریسی باشیندان چیخماییب! یورغانی كنارا تونازلاییر.
"اه نولاردی بیر گون یوخودان دورام گؤرم اؤلموشم"
تختیندن آشاغا دوشور. چیخارتدیغی یئرده اولان گئییم لره، گؤزو ساتاشیر.
"گینه ده حاج خانیم ساواشاجاخ. اوتولری پوزولوب!"
صوبحانه سین سیگارینان باشلاییر. اتاغینداكی گؤزگویه، گؤزو ساتاشیر. بیر توس
تو گؤرور، بیر ده داغاناق ساچلارین. اؤزوندن، یاشاییشیندان حالی قاتیشیر.
درینگ درینگ درینگ درینگ درینگ درینگ
-"سلام بویورون"
-" تولیدین یوخدی؟ New كیشی نئجه سن داوود؟ Hi"
-"سنه نئچه سئری دیییم منه دئیوید دئ، نه داوود. ائله بیر دونن باهمیدوخ ها. قوی بیر یوخودان دوروم، بیر ایكی صفحه اوخوییم، سورا گؤروم تازا بیر زاد تولید اولور یا یوخ!"
-"اولوردا كیشی. بیلوه دئیوید بئكام دییه جاغام! آخی شهرتینده بو كوپئی اوغلی یه یاخیندی 'بهكام كجاباد'."
-"نیه زه ویرمیسان؟"
-"قرض از مزاحمت بودی كی بو گئجه برنامه وار. گؤزل،كمرباریك دافلار،جانا بالا! دیییب لر سنده گلسن"
-"دوننین برنامه سین چیخاتمییین ها. هله ده باش آغری چكیرم!"
-"اؤز تقصیریندی دا! زیاده روی كردی برادر، زیاده روی! و جزاكم الله... ها ها ها ها ..."
-"نقدر سنه دیییم بو امّل لارین اداسین چیخاتما!"
-"یاخچی نیه دؤیوسن؟ دیرم بیر دانا او یازی لاریندان گتی، اوخی. قاباخ آی یازدیغین مقاله 'فمنیسم ایرانی فرصتی برای ایران آریایی' گئدیب از ما بهترونون الینه چاتیب. شاهزاده مقاله ندن خوشی گلیب. دیییب خارج از كشوره گلسه اونو گؤروم."
-"سنی عیسی مسیح باشلاما بو جریانی. اؤزون بولوسن كی..."
-"قاباخدان دییردین 'الله'. جانا بالا دین ده دییشیلدی! هر زادین بیر یولو وار قاچاق گئت..."
-"سنه نئچه سئری دیییم كی من اتئیستم ام. فیس بوكدا دا بونی یازمیشام. بو خراب قالمیش عیسی دا آغزیمدان چیخدی. از بس بو گونلر خاریجی كیتاب اوخوموشام."
-"see you laterیاخجی بولدوم دا. آخشام منتظر حضور آتشین تو در منزل جئفری هستم "
-"byeگؤروم نولور"
"بو گئجه برنامه لریندن، یورولموشام دا!"
كیشی باشین میز اوسته قویور. گؤزلرین یومور و فیكره گئدیر. قوماردا پولون اوتوزان تك یاشاییش قوماریندا عومرون اوتوزدوغون سانیر. ایچی الوولانیر یانیر. بیر فیكر بئینیندن كئچیر. گؤزلری ایشیلدانیر. هؤلسك یئرده اولان گئییم لرین گئییر. قیشقیرا قیشقیرا "گلیرم گلیرم" دئییر. سانكی دلی اولوب. قاپییا طرف یوگورور.
تاخ
تاخ
ساعات ۱۳
"بو دا بیزیم ناهاریمیز" دئیه دئیه، ائوه گیریر. گئییم لرین چیخاردیر، یئره تونازلاییر. قاچا قاچا اوتاغینا گیریر. میز دالیسیندا اولان صندلی دالا چكیر، اوستونده اوتورور. بسته نین باشین آچیر. یئمه یی آغزینا قویور. "اؤلوم ساغلیغینا!". یئمه یی اوتور.
بسته نین اوستونده 'سیچان داواسی' یازیلیب.
مریم علیزاده
۹۱/۹/۱۴
ساوجی دئییر یات
"گؤر نه شیرین یاتیبلار
گؤزونون، عقلینین
كئركئره سین چك آشاغا
سنده یات
ندن بایقوش اولوبسان؟
كیمین بختین قارالاییبسان؟
باشینی قوی سنده یات
سنه نه دولار نئچه دیر؟
سنه نه ورزیقان سویوقدور؟
سنه نه ایش اوشاغی دؤنور؟
سنه نه بو گئجه
هانچی قیز
احتیاجدان
حیاسین ساتیر؟
سنه نه كیم آج یاتیر؟
اونلارین اللهی وار..."
هر دن گؤرورم تانری دا یاتیر...
بو قارانلیق اوزون گئجه ده
او دا شیرین یوخویا باتیر
و اونلاری اورییندن آتیر
اونلاری كیم لره ساتیر؟
ساوجی دئییر یات
"آغریماز باشا ساققیز سالمازلار
سنه نه اورمو گؤلو دوزا دؤنور؟
سنه نه بو تایدا نه كئچیر، او تایدا نه؟
سنه نه كئچمیشین نه ایدی، گله جه یین نه؟
یات
شیرین یوخویا بات
سن قادین سان
سئوینجی نی اوشاقلارینا ساخلا
سئوگینی بوشونا وئرمه بو یاتانلارا
باخ گؤر سنی هئچ اینانان وار می؟
گؤرنه شیرین شیرین یاتیبلار
سن ده یات"
باغیشلا ساوجی
یاتا بیلمیرم
اونلاری فیكریمدن
آتا بیلمیرم
مریم علی زاده
۹۱/۹/۱۰
او گئجه، آی آلتی، سئودیییمیز گؤلده، قاییق ایچینده، آیا باخیب دئدین: سنه سؤز وئریرم، یاشامیمین سون نفسینی وئرنه دك بو سئوگی ایلقاری پوزولمایاجاق! آی دا تانیق اولسون!
باشلادین كوره میه، گؤلون ایچینده كی آی پؤزولدو.
گونلر، گئجه لر، آی لار كئچدی. بیر گئجه، همان دوروشدا، قاییق ایچینده، گؤزلریمه باخیب دئدین: من آنامین سؤزوندن چیخمارام. بیلیرم قوتالاجاقسان!
اؤتوز ایل كئچیب. ایندی هر گئجه، همان دوروشدا، قاییق ایچینده، سن سیز، تانیقیمیزا باخیرام.
آیی تانیق توتورام، سئوگی ایلقارین سن پوزساندا، من پوزمادیم. قادینلیقیما باخما، كیشی كیمی سؤزومون اوستونده قالدیم!
مریم علی زاده
۹۱/۷/۱۹
وبلاقا گؤره
اونودولموش شاعیرلییمی یادیما سالدین
من شاعیر اولمایاجاقدیم
سن منی شاعیرلتدین!
سون یازیلار
بؤلوملر
آچارسؤزلر
- شعر (4)
- سئوگی (3)
- آنا (2)
- تورکجه (2)
- بایاتی (1)
- شیرین (1)
- محرم (1)
- دونیا (1)
- تورک (1)
- آزربایجان (1)
- وطن (1)
- آراز (1)
- مریم_علی_زاده (1)
- قیسا_شعر (1)
- قیسا شعر (1)
- تورکجه شعر (1)
- مریم علی زاده (1)
- شعر ترکی (1)
باغلانتی لار
ساخلانج
- خرداد 1402
- بهمن 1397
- دى 1395
- آذر 1395
- آبان 1395
- مرداد 1394
- فروردين 1394
- اسفند 1393
- شهريور 1393
- مرداد 1393
- تامام آیلار
سایغاج
- ایندی وبلاقدا :
- بو گونون گؤروشو :
- دونه نین گؤروشو:
- بو آیین گؤروشو :
- بوتون گؤروشلر :
- یازیلار :
- باخیشلار :
- یئنیله مه چاغی :