بیز 54 كیشی دیك

پنجشنبه 31 مرداد 1392

+0 به یه ن

ایكینجی ایل نازیلا لا تانیش اولدوم

ایش لری بؤلموشدوك

تمرین لری او یازاردی

پروژه لری من

 

اوچونجو ایل داها چوخ بیربیریمیز له تانیشدیق

داها چوخ بیربیریمیزه یاخینلاشدیق

و بؤیوك یولداشلیق لار قوردوق

ائله یئنی یولومون باشلانیشی دا

بو ایلیدی

شن آی، زهرا و من ATO یا گئدردیك

گاهدان الهام، سئلدا و طیبه ده بیزه قوشولاردیلار

قاییدیش دا سؤزلری تحلیل ائدردیك

گاهدان دا دانیشانلاری

و دوروموموز اوچون سونسوز كدرله نردیك

 

گون دوغان گزیسی

اونودولماز بیر گزیدی

شن آی، زهرا، سئلدا و من واریدیق

اینانیلماز خوش كئچدی

اؤلومونه اوشوردوق ها

یالان یوخ

هامی اوشوردو

اوردا چیخاندا

دوكتور سلمانی له راستلاشدیق

آغزیمیزین چئوره سی گیلانارلی اولماقدان دولایی

اونلاری سیلمه یه چالیشیردیق

بیر كومئدی دورومدایدیق

سونرا دا سالاملاشدیق

 

من له زهرا گاهدان دویغولانیب یازی یازماغیمیز اوچون

شعر اوجاغی قوراردیق

هامینی چئوره میزه ییغاردیق

گاهدان اؤز شعرلریمیزی اوخویاردیق

 

((نه تانیش قوخون وار سئوگیلی!

تبریز قوخور تنین...

گؤزلرین گؤی مچید

نامازلاریمی سنده قیلاسیم گلیر،

قُربَةً الی سَن!

سجاده م قارا گیلن...))

 

((ردیف ۱۳۷۰

پلاك ۳/۱۱

دوغولدوم تبریز قبریستانیندا

"لا اله الا الله"

 

تبریز قارانلیق

تبریزین گئجه لری اوزون

تبریز قوجا

تبریز یورغون

تبریز پارا

تبریز یارا

تبریز سینیق ارك

داغیلمیش گونش آسلان تئاتری

تبریز بیر درام))

 

گاهدان سحر خانیم

((گلیرم قاندا قالان قلبیمی غمدن آلاسان

گلیرم من قورتارام سنده فقط سن قالاسان))

 

گاهدان سعید موغانلی

((سن اؤلومله یاشامین

دؤنوش نوقطه سی سن

قوجاغین امنیت دیر

گؤزلرین تئروریست))

 

گاهدان رامیز روشن

((یئنه بو شهرده اوز اوزه گلدیك

نئینه یك آیریجا شهریمیز یوخ

بلكه ده بیز خوشبخت اولا بیلردیك

بلكه ده خوشبختیك خبریمیز یوخ))

 

گاهدان نصرت كسمنلی

((گئتمك ایسته ییر سن بهانه سیز گئت

اویاتما مورگولو خاطیره لری

سسین همین سس دیر باخیشین اؤگئی

گئدیرسن سسین ده یاد اولسون باری))

 

كافی شاپ لار دا دا بو شعری

((وطن ساغلیغینا باده ایشمزلر

وطن ساغلیغینا جاندان كئچرلر

وطن ساغلیغینا آل قان ایچرلر

وطن ساغلیغینا معنادیر اؤلوم

وطن ساغلیغینا شربت دیر زولوم))

 

دؤردونجو ایلین ایلك تئرمی

دوروم چوخ كؤتویدو

باشلار كیتابدایدی

هاممینین اوخوماماق ادعاسی واریدی

اما سؤز گزمه یه گئتمه كه گلنده

كیمسه گلمیردی

 

ایكینجی تئرم گلدی

بؤیوك بؤیوك خاطیره لر یارادماغیمیز گره كیردی

آرتیق بو سون تئرمی دی

داها درس اوخوماغا دا حوصله قالمامیشدی

كیلاسلارا آتدا بوتدا گئدیردیك

چوخوندا اوستادا قولاق وئرمیردیك

دولانماق هاواسی بئینیمیزه وورموشدو

چوخلو یئرلری گزدیك

ائل گؤلو، آیدین، دلستان، چنچنه، لاله پارك

اؤزوموزو گؤرمه میشلیكه وورموشدوق

هر یئرده فوتو چكیردیك

اونلار فیس بوكو پارتلادیردی

لایكلانیردی، كامنت یئییردی

قیامت یولا سالیردی

و آنی لاریمیزی سون سوزلاشدیریردی

زاكربرگ ده كئف ائلیردی

 

آرتیق 4 ایل كئچدی

سئوینجی له، كدری له

اوستادلارین الیندن، جانا گلمه سی له

دئیینمه سی له

دئمه لی مهندیس اولدوق

 

بیز 54 كیشی دیك

فریبا، شن آی، طیبه، ایكی الهام، زهرا، نازیلا، سئلدا ،اوچ مهسا، نرگس، بهاره، وحیده، شبنم، سبا، فرزانه، ایكی سمیه، شمیم، سئودا، مهلا، هانیه، ساناز، معصومه، صدف، نسیم، آزاده، نگین، كیمیا، رامك، آیلار، مرضیه، محمود، روح الله، ایكی هادی، مجتبی، امیر حسین، بهرام، میلاد، شهرام، محمد، امیر، سالار، مهدی، نعمت، حسن، آرش، سینا، حسین، محسن، بهرنگ و من، مریم

 




بؤلوم : شعر یازار : مريم علي زاده 1 باخیش