سن له داعشین نه فرقی وار؟
داعش باش کسیرسه
سن کؤنلومو سیندیردین
سن له داعشین نه فرقی وار؟
داعش موزه لری سیندیریرسا
سن منیم وارلیغیمی
شعرلریمی الیمدن آلدین
داها شعرلریم سن سیز قالیب
داها دویغولاریم...
بویورون کؤنلومون افندی سی
یاپدیغینیزا باخیرسینیز می؟
باخ من همانام
بیر آز سرتلشمیش
بیر آز قوروموش
بیر آز اؤلموش
و سن
سن ده همان...
یوخ دئییلسن
آمان آمان آی امان
هئچ وئجیینه ده دئییل
نه ائدیم
قارقیش باجارمیرام
آنام منه نفرتی اؤیرتمه دی
من اورک سیندیرماغی دا باجارمیرام
باخ، دوشمن لریمله ده
مذاکره قاپیسیندان گیریرم
نه دیکتاتورلوغو اؤیرندیم
نه دیکتاتورلاری قارقیش ائتمه یی
نه ده بیریسینین اؤلوموندن سئوینمه یی
اما سن...
اؤلدوروب کئچدین
اؤلوم نفس کسیلمه دئییل
اؤلوم کؤنلون سینماغیدیر
اؤلوم دویغولارین اؤلمه سیدیر
سن له داعشین نه فرقی وار؟
بویورون کؤنلومون افندی سی
یاپدیغینیزا باخیرسینیز می؟
بیلمیرم ندن سئوگی می دویاندان سونرا
نه مئساژلاریما جاواب وئردین
نه تئلئفونلاریما
یقین سئوگی مه لایق دئییلدین
سن ده منی سئوسیدین
دونیا حسرت قالاردی سئوگی میزه
بوتون شعر دفترلری سئوگی میز له دولاردی
یئنی نظامی لر یاراناردی، یئنی واحیدلر، یئنی کسمنلی لر
یئنی سارالار، یئنی ساری گلین لر
یئنی اصلی لر، یئنی کرم لر
سن له من یئنی دن یاراناردیق
شعرلریمیزده
دویغولاریمیزدا
ساواشلاریمیزدا
اما سن...
سؤز وئرمیشدیم
داها شعر یازمایام
یازین گلمه سی
یئنه منی شاعیرلتدی
93.12.16