بیز 54 كیشی دیك

پنجشنبه 31 مرداد 1392

+0 به یه ن

بیز 54 كیشی دیك

20 اركئك

34 قادین

54 یئنیلمز IT اؤیرنجیسی

آدیمیز  IT88  دئیه

بیلیم یوردونون آنلینا یازیلمیشدی

بوینوموزدا آغیر كدلار، فیكریمیزده بؤیوك آددیملار

ال كیبورددا، قولاق هئدفوندا

اوتوراردیق راهرودا

نه میتینگ لر قورولاردی اوردا

امتحان لار یاخینلیغیندا

انتخاب واحد واختیندا

 

ایلك ترم لر كیلاسین هاواسی

چوخ بوغوردو

هله بیربیریمیزی اییی تانیمامیشدیق

دونیادان نه ایسته دیگیمیزی ده بیلمیردیك

ایلك كز بیربیریمیزی اینگلیزجه كیلاسیندا گؤرموشدوك

ائله اوندان سونرا دا عزتی نین آدی hubble bubble اولدو

شكیب چوخ اییی اینگلیزجه قونوشوردو

اونون اوچون، اونو زرنگ شاگرد ظن ائدیردیك

الهی ایلك ترم لر اؤزون چوخ گؤستریردی

اونون اول شاگرد اولماسین سانیردیق

پرنده نین ده 360 درجه تیپ دییشمه سی

كت شالواردان اسپورتا اینانیلمازیدی

 

نصیریان گیل دیقه باشی بیزیم كیلاسدایدیلار

هئی IT دان دئیردیلر

4 ایل كئچدی

هله ده IT  نین نه اولدوغون باشا دوشمه دیك

بیز، فرزانگان اوشاقلاری

نصیریانین تاك شو ایسه شبكه كیلاسلارینا گئدردیك

كیلاسیمیزدا تكجه اونلارین سؤزلرینه قولاق آسان بیزیدیك

سونرا نرگس گیل روح الله گیل له بیرلیكده سمینار ایشلرینه قوشولدولار

اونلارین ایشلری اؤزلرین ایلگی لندیریردی

 

سالار گیل، روح الله گیل و محمود دان سونرا

قالان اوغلانلاریمیز ساكیتیدیلر

اونلارین سس لرین چوخ آز ائشیدردیك

نئچه ترم دن سونرا

قیزلارین بعضی سی

اونلار لا كیلاسداش اولماقلارین دا بیلمیردیلر

  



بؤلوم : شعر یازار : مريم علي زاده 1 باخیش

سنی سئومه یی نئجه دانیم؟

چهارشنبه 23 مرداد 1392

+0 به یه ن
سنی سئومه یی دانا بیلمه رم
اونو فیس بوكدا بیلیر 
یاخین دوستلار لیستیمده اولماغین اوچون
لایك لاریم ایسه كامنت لریم اوچون
گوگل ده بیلیر 
آختاریشلاریم دا آدینی یازماق اوچون 
موزیلا دا، كروم دا بیلیر 
وبلاگینا باش ووردوغوم ایسه باخیش یازدیغیم اوچون
بلكه CIA ده، پولیس لرده بیلیر 
گاهدان بیزلری ایزله دیگی اوچون 
بلكه ده بیلگی سایاریما ویروس سالان گده لرده بیلیر
بلكه سن اؤزونده بیلیرسن...
سنی سئومه یی نئجه دانیم
بیرگون زاكربرگ جنابلاری، اشمیت جنابلاری، پولیس لر جنابلاری
عشق لری چكیب 
سنی سئومه یی دونیایا بیلیندیرسه لر؟

مریم علی زاده
92/5/23



بؤلوم : شعر یازار : مريم علي زاده 1 باخیش

وطن وورغونو

جمعه 11 مرداد 1392

+0 به یه ن
جانیمین قورخوسوندان دئییل
سؤزوندن چیخمه مك اوچون
داها مئساژ گؤندرمیرم
صفحه لر یوكله ننده
آدین اولماسین دئیه
مینلر دؤنه اؤلورم
اؤلوم اولسون بو فاشیست قانونا
وطن وورغونو اولماغین
نه بؤیوك جزاسی واریمیش!

مریم علی زاده


بؤلوم : شعر یازار : مريم علي زاده 6 باخیش

بو گونلر

جمعه 11 مرداد 1392

+0 به یه ن
بو گونلر 
كیمسه حالیمی سورمور
جئب تئائفونوما گلن مئساژلار
گوگلدندی (google)
اكانتیمی (account) وئریفای (verify) ائتمك اوچون!

مریم علی زاده


بؤلوم : شعر یازار : مريم علي زاده 0 باخیش

سنی سئومكدن باشقا

جمعه 11 مرداد 1392

+0 به یه ن
سنی سئومكدن باشقا
آیری ایشیم یوخودو
آنلاسایدین
سنی اونوتماقدان باشقا
آیری ایشیم یوخ
كؤنول آنلاسا
نه یازیق
هئچ بیریمیز آنلامایی
اؤیرنمه دیك!

مریم علی زاده


بؤلوم : شعر یازار : مريم علي زاده 1 باخیش

قاندال

جمعه 11 مرداد 1392

+0 به یه ن
بو گئجه بوتون سئوگی لرین
كؤكون یولاجاغام
دونیادان یورغون آداما
قاندال نه گركدیر!؟

مریم علی زاده


بؤلوم : شعر یازار : مريم علي زاده 1 باخیش

هارایلاریم

جمعه 11 مرداد 1392

+0 به یه ن
گؤز گؤردو
اورك یاندی
دیل سؤزه گلدی
بیریسی سوس دئدی 
بیریسی باشینی كسرلر
بیریسی دوزدو اما هر سؤزو دئمزلر
هارایلاریم بوغازیمدا بوغولدو

مریم علی زاده


بؤلوم : شعر یازار : مريم علي زاده 0 باخیش

قارا

شنبه 5 مرداد 1392

+0 به یه ن
آتالاریمیز 
قارا گونلریمیزی بیلیردیلر
اونون اوچون
باغیمیزی، داغیمیزی
قارا آدلاندیردیلار!

مریم علی زاده
91.5.1




بؤلوم : شعر یازار : مريم علي زاده 3 باخیش

سنه یازدیغیم شعرلری

پنجشنبه 3 مرداد 1392

+0 به یه ن
سنه یازدیغیم شعرلری
گؤیچویه وئریب
دوندورما آلاجاغام
اورییمین اودون سؤندورمه یه
 
 
سئومیرسن ده سئومه
سئو سئویل سن سیز سس سیز سوكاك لاردا
یاساقدیر
 
 
یاخینلاشما منه
اخلاقیمیزین امنیتی خطره دوشر
بارماق باسدیراللار هااااااا!
 
 
آخ آمئریكا آسقیردی
دولار باهالاشدی
میوه جئیران داغینا چیخدی
جئیران داغیندا آدام بئجرتمك اولور مو؟
 
 
ائل گؤلونون باشینا دولانیب
ایكی كیلو آزالتسایدیم
گؤی گؤزلو مچیدیمیزده
ایكی ركعت ناماز قیلسایدیم
اركیمیزده
شرفلی بایراغی قووزاسایدیم
 
 
دوددورو دورود تیراختور 
داغلاری سؤكر تیراختور
آزربایجان وار اولسون
ایسته مه ین خار اولسون
آسیا بیز گلدیك
اودوزدوق بایقوش كؤلگه سینده
دیلیمیز آغزیمیزدا باغلی اولسادا
باغیردیق آچیلان پلاكاردی اورییمیزده
 
 
بیزیم هر شئییمیز ناقیص قالدی
دموكراسی آزربایجانا خیاوان چكدی
تولاندی مركزدن گلن یوللارین بوشلوغونا
قزئت لرده شرفیمیزه توخوندولار
خیاوان لاری قانیمیزلا سوواردیق
دویورمادی قارنی توخلاری
گلینیمیز سوسوز قالدی
دیله گتدیك
كربلا یارادا بیلمه دیك!
 
 
هئیییی نه لر كئچدی باشیمیزدان
نه لر گله جك باشیمیزا
دایان آ شوفر
ایستگاهی اونوتدوم!
 
 
مریم علی زاده



بؤلوم : شعر یازار : مريم علي زاده 0 باخیش

قیسا شعرلر 3

پنجشنبه 3 مرداد 1392

+0 به یه ن
1
سیاست
هر ماهنی سی لا
اوینادیغیمیز
تكجه سازیدی
 
2
نقدر اوغورسوزلوغو
سالیم قیسمت باشینا
تانری دا بیر آز اوتاسایدی
 
3
بیر پاكاتدان ایكی پاكاتا یئتیرمیشم
گونده كدر چكمه یی
 
4
آز قالا اؤزومده ایتیرم
بو قاریشیق گونلریمده!
 
مریم علی زاده


بؤلوم : شعر یازار : مريم علي زاده 0 باخیش

1 |