دونیانین ان یورغون شاعیری

مریم علی زاده نین شعرلر و باخیشلاری

كابوس

ردیف ۱۳۷۰
پلاك ۳/۱۱
دوغولدوم تبریز قبریستانیندا
"لا اله الا الله"
 
تبریز قارانلیق
تبریزین گئجه لری اوزون
تبریز قوجا
تبریز یورغون
تبریز پارا
تبریز یارا
تبریز سینیق ارك
داغیلمیش گونش آسلان تئاتری
تبریز بیر درام
 
تبریز ده تابیتلار یئریییر
تبریزین اؤسكوردن هاواسیندا
رومانتیك اولماغیم گلیر
 
بیر تانیش سس قولاغیمدا پیچیلدانیر
...سنین سسین
دئدیم یارالی اورییمه مرهم اولارسان
دئدیم بیرلیكده
اؤلولری چیخارداریق تابیتلاریندان
یئنیدن دیریلدریك
...اما سن
...اه نقدر سنه دئملی سؤزلریم وار
 
تبریز باریت قوخور
قاباقدا بیر كیشی
اؤلومله قول قولا گئدیر
تابیتلار اونون حسرتین یئییر
او سن دئییلسن می؟
سن او دئییلسن می؟
 
تبریزی اناالحق سؤزو بورویور
منی سنه ساری سورویور
وعده میز ساعات قاباغیندان بیلیم یوردونا
سن ساغدان
من سولدان
بیرلیكده گئدیریك اؤلومه ساری
 
قوجا تبریز قان قوسور
مین ایللیك خسته لیگی بیردن جوشور
كوچه لره سو سپمیشم
سن گلنده قان اولماسین
 
تانری ساعات ایمارتیندن بویلانیب باخیر
اولدوزلار آیا حسرت قالیب
گؤی مچید لا اله الا الله هارایلاییر
قوردلار اولاییر
پولیسین چینینده كی اولدوز قوپور
گلیر سنه ساری
و" دئییرسن
تن" ین دوشور توپراق اوسته
 
دیكسینیرم
یوخودان دورورام
یئنه ده كابوس
...نقدر كابوس
یوخو دا كابوس
!اویانیش دا كابوس
 
مریم علی زاده
۹۱/۱۰/۲

آردینی اوخو
شنبه 29 تیر 1392
بؤلوملر : شعر,

قوی دئسینلر...

قوی دئسینلر راسیستم
من تانری اولسایدیم
هامینی
سنین ائنین، سنین بویون
و سنین دوشونجه نده
یارالداردیم، گؤزلیم
 
 
قوی دئسینلر تئروریستم
 
كلاشینكف لا
اینجیدن لرینین، دوشمن لرینین
بئینین، اوریین پارتلاداجاغام
همده
الینه باتان تیكانین
كؤكون یولاجاغام
 
 
قوی دئسینلر ناسیونالیستم
سن آیاق قویدوغون توپراغی
تبریز توپراغین
سورمه ائیله یه جه یم گؤزلریمه
سن كئچدیگین یوللاری
وطن ائیله یه جه یم اؤزومه
و سن دئدیگین آنا وطنه
جان وئره جه یم
 
 
قوی دئسینلر آنارشیستم
سن سئومه دیگین هنجارلاری، پوزاجاغام
اودسوز ائولره،‌ اود ویراجاغام
و هامینی وحشته سالاجاغام
بو سئوگینی هارایلایاجاغام
ارك دن چیخاجاغام
گؤی مسچیدینده باتاجاغام
 
 
قوی دئسین لر ایده آلیستم
هله ده اویانماغا اینانیرام
هله ده ایدئولوژونون اوتماغینا،‌ اینانیرام
هله ده ایدئولوژی یولوندا
دوستاق چكنلره اینانیرام
هله ده سنه اینانیرام
 
 
سن منیم اولماساندا
سنین دوشونجه توخومونو
یاتان تبریز اوسته سپه جه یم
 
بو توخوم چیچك وئره جك
اون ایل
ایگیرمی ایل
یوز ایل سونرا
شاید ده من گؤرمیم، گؤزلیم
 
 
سنین چیچیین
سهندین اتیین آلاجاق
بابك قالاسیندا گؤیه اوجالاجاق
 
سنین چیچیین
ان سئودیگیم
ماوی
آل
و یاشیل چیچك لر
 
 
مریم علی زاده
 
۹۱/۹/۱۹

آردینی اوخو
شنبه 29 تیر 1392
بؤلوملر : شعر,

قیسا شعرلر2

1
نه غریب حیكایه دیر
بیزیم حیكایه
توپراق دان دوغولوروق
توپراق دا یاتیریق
آنا توپراق لا دا سئویشیریك!
 
2
بو دؤنه ده گلمه سن
عزرائیل له سئویشه جه یم
 
3
گل گئدك بز قالاسینا
كیم نه بیلیر
بلكه یئنی دن بیر بابك قووزادیق
 
4
عمرلر آزالیب گؤزه لیم
قورخورام سنی گؤرمه یه
عزرائیل مهلت وئرمه یه

آردینی اوخو
شنبه 29 تیر 1392
بؤلوملر : شعر,

قیسا شعرلر

۱
اؤز الیمده دئییل سنه یازدیغیم شعرلری باشقاسینا اوخوماغیم گلمیر!
 
۲
او قدر اؤزومو گؤرمه مزلییه ووردوم
كورا دؤندوم
 
۹۱.۱۱.۵
 
۳
ائل گؤلونو اونوت
گل بیر آزدا وادی رحمت پاركین قدم له یك!
 
۹۱.۱۰.۶
 
۴
من سن مینلر له تن
یاشاتمالی ییق
آزربایجان آدلی بو وطن
 
۹۱.۱۱.۱۳

آردینی اوخو
شنبه 29 تیر 1392
بؤلوملر : شعر,

علیرضا بزاز مهدویونا سونولور

علیرضا بزاز مهدویونا سونولور

یوخلوغونو هله ده اینانمیرام
سن گئدندن هر شئی نرمال
تبریزین هاواسی گاهدان سویوق گاهدان ایستی
شهر ترافیك توستو
بازار، یاد آداملار لا دولو
گاهدان دا، بیر تانیش قوخو
موصوبتلریمیز داوام ائتمك ده دیر
تحریم لرین اثری
بیلیم یوردو
ماشینین باهالاشماسی
و 206 لرین آشماسی
جاوانلاردا بئیین قوجادان فیكیرلر له خاریج هاواسی
هر شئی نرمال قدر نئهیلیسمه سورور آدامی

گاهدان بیزه ده بیر خبر گتیر یئنی یئریندن
اوردا دا تانری كوسوب مخلوقات اشرفلریندن؟
اوردا دا ملك لر یاساقلاندیریب سئویب سئویلمه یی؟
اوردا دا...
بلكه ده بیر شیرین یوخودور اورا

سنی بؤیله داش اورك بیلمزدیم
ندن آنانی بیراخیب گئتدین؟
ندن جانینی كؤزه چئویردین؟
آه آیریلیق
دردلرین ملكی آیریلیق
بیر آنانین اوره یینی نئجه اودلاییرسان آیریلیق

سن سیز آپارتماندا حایات داوام ائدیر
حیط چیچكله نیب
قوخوسو آدامی مست ائله ییر
یانلیز
گیریش، حیط، پیلوت، آسانسور قدملرینه حسرت قالیبلار
منده هله فیكیرله شیرم
بیر گون آسانسوردا اوز اوزه گلیب
سالاملاشاجاییق

مریم علی زاده
92.2.2

آردینی اوخو
شنبه 29 تیر 1392
بؤلوملر : شعر,

من اؤلسم

من اؤلسم
كیمسه بیله مه آغلامایاجاق
قبریم یوللار توزو یئیه جك
بیر تانیش باشماغا حسرت قالاجاق

من اؤلسم 
سن ده آللاه رحمت ائله سین دئیه
یولونو چكیب گئده جكسن
قیرخیم چیخاندان سونرا
منی ده اونودا بیله جكسن

من اؤلنده
سویونان یوخ
قانینان بیله می یویون
ناماز قیلمایین
بیله مه میللی مارش اوخویون
جنازه می یئردن گؤتورنده
لا اله الا الله یوخ
یاشاسین آزربایجان سؤیله یین

قبیره قویاندا
دوعا اوخویوب، دبردیب، یوخومو پوزمایین
یخه ن قورتاردی دئیه
یئنی ائوین موبارك اولسون سؤیله یین

همده نوحه خوان یوخ
آراز ائلسسی چاغیرین
سئودیگیم ماهنی لاری دینله یین
شاعیر یولداشلاریمی چاغیرین
میللی شعرلرین اوخوسونلار

من اؤلنده
مسچید توتمایین
تعزیه می بابك قالاسیندا توتون
رستوران توتوب توخ قارین لاری دولدورمایین
هر نه لرین الدن وئرن، قاراداغلی قارداشلاریما 
یاردیم ائدین

من اؤلسم
قبیر داشیم اوسته یازین
دونیانین ان یورغون شاعیری

مریم علی زاده
92.1.13

آردینی اوخو
شنبه 29 تیر 1392
بؤلوملر : شعر,

سؤزونوزو نه تهر اینانماق اولور؟


اینانمیرام تئلئویزیونون باغیردیغی سؤزلره
نه لر یولوموزو گؤزلورو، بیلمه سك ده
نه لر باشیمیزا گلدینی یاخشی بیلیریك
تهلوكه لره باتیریق، چابالاركن جوموروق
ایتیریریك آزادلیغی، آزادی مئیدانیندا
خارابا قالیر، اوچور اومودلاریمیز
آرتیق سؤزلرینین بوشلوغوندا بیلیریك
بئجردیریك كؤنلوموزده نیفرت آغاجین
آغرینیریق آدین دیلیمیزه گتیرمه یه
"تئزلیك له یاز گله جك" دئیه ن بی لر
سؤزونوزو نه تهر اینانماق اولور؟ 

مریم علی زاده
92.1.9

آردینی اوخو
شنبه 29 تیر 1392
بؤلوملر : شعر,

آنا

سن نه بویوك سن
آنا
 
سندن توپراق دوغولور
سندن دیل دوغولور
سندن وطن دوغولور
 
ائله سانیرام
سندن دونیام دوغولور
 
مریم علی زاده
91.12.15

آردینی اوخو
شنبه 29 تیر 1392
بؤلوملر : شعر,

آزربایجان

كؤنلومده بیر نیسگیل وار
آز دان چوخدان چوخ بؤیوك دور
ار لری آت سیز قاییتماز بیریسی دیر
بابك تك آزادلیق یولونا جان آتیر
آی اولدوزدان پار پارلاقدیر
جان وئره جه یم اونون یولوندا
 
مریم علی زاده
91.12.11

آردینی اوخو
شنبه 29 تیر 1392
بؤلوملر : شعر,

كئفلندیر منی

سؤزلرین پییالا پییالا عراق
بوتون نیسگیل لری جانیندان ایراق
گل شعیر باده سین یئنی دن ایچك
سنی سئویرم دئ، كئفلندیر منی
 
مریم علی زاده
۹۱/۱۱/۱۸

آردینی اوخو
شنبه 29 تیر 1392
بؤلوملر : شعر,